الحب زى الكره عايز قلب
السجن اضعف
من خطاوي الزمن
مادام في قلبك يا سجين الوطن
عزة الإنسان
وف كف أيدك زهرة الحرية
اللي بيطرحها شجر بكرة
وغيطان الريح
مصر اللي آهاتها غناوي جريح
شرخت في قلبه الهزيمة
لكنه ما كرهش ناسه
وانتفض بالرفض
لما قدر يكره – ومن قلبه
كل اللي شارك ودبر في الخفاء
الجريمة
وطلع علينا ولا شجيع السيما
يتباهي علي شعبة
ويساوم علينا بدنئ ذنبه
ودناوة السمسار
في ربيع الوطن . !
السجن للسجان
السجن ذلة
لحضرة السجان
وتقسي قلبه برودة القضبان
لكن الحين اللي يوهب
نفسه للأوطان
يابخته حتى ف ظلمة الزنزانة
ليلاتي بتزوره رقة
خضرة الأغصان
ودفا حنان الحبيبة
والصحبة والخلان
والشعر والشمس
في أحضانه يتلاقوا
يكسوه بتوب من ريش
وللحرية
يعلموه في أمل –القدرة ع الطيران !!