الشاعر القليط

الشاعر القليط
منوفي قوي وغويط
ولاعبها صح جدا
مع انه بيبان عبيط

***
حويط مع السلالم
في سكه الصعود
دي سلمه نواعم
ودي سلمه صعود
ودي بسطة هوانم
في حريم أبو السعود

***
الشاعر الخليط
سبعيني ستيناتي
يعمل من كلمة بيت
وديوان غزل بناتي
يخلط ميه في زيت
بيتزا علي فول حراتي

***
الشاعر الشريط
ساعات كان ثوري جدا
وساعات في مالطة يدن
بس في كل الساعات
بيفوز عدا ونقدا

***
في سكة الصياعة
فارس وسط البلد
وان زنقت علي الشجاعة
يقش بالولد

***
رومانسي راديكالي
ويساري لكن هيجن
كاجوال لكن موالي
في زواريق اليمن

***
بيان لك علي الحديدة
صاحب مرض خطير
له ذكريات سعيدة
في الشارع الفقير
وجميع بدله جديدة
لسهرات الوزير

***
حيرني شعره خالص
بين تقليدي وحدثي
لكن عصر النواقص
خلاه سرق ميراثي
مع انه سهن مايص
زى بتواع النواصي

الدين معامله - وعمل
تقدر تقول لي
ليه بلادهم نضيفه
ولحنا السلاله الشريفة
من الزبالة نعاني
وليه طباعك
من نار إيمانك مخيفة
وهمه مع كفرهم
مارسوا الفنون ربانى
فسر لي .. ليه في الجد
أيدهم عفيفة
وإحنا ريحتنا بقت
ولا مخزن الفسخاني
بنبيع ضميرنا الحر
علي تعريفة
ونبيع بلدنا طمع
ع الكرسي نلبد تاني
لو كنت مؤمن بجد
روحت ترف شفيفه
تعف أيدك
ولا تشمت أحزاني
والرب رحمة
وهبنا الدنيا تكليفه
علشان نعمرها حب
ونبض إنساني
وليه مصمم تشرح يومي
في الجيفة
ونقب الدنيا غابه قانونها حيواني
الدين معامله ما هوش زفه وهتيفه
والرب مالوش خليفة
من بشر فاني